Dy persona, të identifikuar nga policia si Mihal Jani, 60 vjeç,dhe Anila Llulla, 50 vjeçe, u gjetën të vdekur ditën e djeshme në katin e dytë të një pallati në plazhin e Golemit.
Ata dyshohet se humbën jetën të asfiksuar nga gazi, në rrethana ende të paqarta. Në trupat e tyre nga verifikimet paraprake nuk janë konstatuar shenja dhune, ndërsa mësohet se kanë qenë fëmijët respektivë të viktimave, që në mënyrë të pavarur nga njëri-tjetri, kanë dhënë alarmin pasi nuk po lidheshin dot me prindërit e tyre.
Një ditë më parë, djali i 50-vjeçares mësohet se ka denoncuar humbjen e kontakteve me të ëmën që nuk ishte kthyer në banesën e saj në Tiranë.
Nga veprimet e para hetimore rezulton se viktimat kishin një raport intim mes tyre. Sipas njoftimit të policisë, vdekja u zbulua rreth orës 17:45 të së shtunës kur në banesën e 60-vjeçarit Mihal Jani u gjetën pajetë trupi i tij dhe A. Llullës, banuese në Tiranë..
Në vendngjarje ka shkuar policia dhe grupi hetimor, ndërsa pritet ekspertiza mjeko-ligjore për të përcaktuar shkakun e vdekjes dhe rrethanat e plota të ngjarjes së rëndë.
