Kreshnik Çipi: Kur Flamurtari mundi Partizanin e Beogradit shkodranët na pritën si të ishim ekipi i tyre

Në ditën e veçantë të Pavarësisë së Shqipërisë vëmendja është kthyer në sukseset e arritura në sportin shqiptar në këto 109 vite.

Kreshnik Çipi, ish-futbollist i Flamurtarit duke folur për emisionin “Ora Sport“ në “RTV Ora“, ka treguar eksperiencën e tij në futboll në kohën e vështirë të komunizmit, por që edhe atëherë nuk mungonte mbështetja në transfertat e Kombëtares.

Madje tregon një detaj të veçantë kur pas fitores në Serbi kundër Partizanit të Beogradit ekipi i Flamurtarit është pritur në mënyrë të jashtëzakonshme në Shkodër.

“28 nëntori është një ditë e veçantë për të gjithë shqiptarët, jo vetëm për ata që jetojnë në trojet shqiptare. Ne patëm fatin ta provojmë në ato vite të veçanta në vitet 90, kur shqiptarët nuk kishin mundësinë të kalonin kufirin ne kishim mundësinë të shkonim. Ne shihnim në terrenet sportive kur shkonim flamuj shqiptarë nga shqiptarët që ndodheshin jashtë trojeve tona. E ndjeje veten më të fortë dhe më të zotë për të luajtur. Në Europianin në Francë në ndeshjen e parë më shumë se 2/3-tat e stadiumit ishin me flamuj shqiptarë. Kjo është një histori e gjatë. Ka pasur periudha shumë të lavdishme dhe të suksesshme. Edhe në ato raste kur përparësia ka qenë për klubet, krenaria ka qenë e gjitha kombëtare. Kur jemi kthyer atëherë në Beogradi në Shkodër na kanë pritur sikur të ishim ekip i Shkodrës.”, ka thënë Kreshnik Çipi.

LEXO EDHE  Superiorja i lë vendin Kupës në mesjavë, spikat derbi i kryeqytetit. Ja kur luhen ndeshjet çerekfinale