Autoritetet shëndetësore holandeze thanë të shtunën se kishin zbuluar 61 raste të COVID-19 midis njerëzve që fluturuan të premten nga Afrika e Jugut.
Bëhet e ditur se po bëheshin teste të mëtejshme për të parë nëse ndonjë prej tyre ishte i infektuar me variantin e ri omicron.
Rastet u zbuluan mes rreth 600 pasagjerëve që mbërritën në aeroportin Schiphol të Amsterdamit në dy fluturime të premten. Kjo përpara se qeveria holandeze të ndalonte trafikun ajror nga Afrika Jugore për shkak të shqetësimeve për variantin.
Autoritetet shëndetësore holandeze thanë të shtunën se do të kërkonin të kontaktojnë gjithashtu edhe udhëtarët që kishin mbërritur nga Afrika e Jugut, Botsvana, Eswatini, Lesoto, Mozambiku, Namibia dhe Zimbabve që nga e hëna dhe t’i nxisnin ata të bëjnë një test sa më shpejt të jetë e mundur.
Pasagjerët nga fluturimet e së premtes u mbajtën të ndarë nga udhëtarët e tjerë dhe ata që rezultuan pozitivë po mbahen të izoluar në një hotel afër aeroportit, shrkuan Reuters.
Një zëdhënës i ministrisë së shëndetësisë tha se nuk do të dihet deri më vonë të shtunën nëse ndonjë nga pasagjerët është i infektuar me variantin e ri.
Qeveria holandeze njoftoi të premten mbylljen e bareve, restoranteve dhe shumicës së dyqaneve gjatë natës, teksa përpiqet të frenojë një valë rekord të rasteve me COVID-19 që po godet sistemin e kujdesit shëndetësor.
