Gazment Bardhi, Sekretari i Përgjithshëm i PD, ka hedhur poshtë akuzat e Monika Kryemadhit, kryetare e LSI, sipas të cilit, Bardhi dhe Lulzim Basha duhet të japin sqarime për deklaratat e tyre kundër LSI dhe artikulimit në emër të ambasadës së SHBA.
Bardhi u shpreh në emisionin “Kjo Javë” në News 24, se kurrë nuk ka folur as në shqip dhe as në anglisht për LSI.
“Nuk kam qenë kurrë në zyrën e ambasadores së SHBA, kurrë nuk kam folur për LSI sepse nuk më është dashur. Kurrë nuk jam shprehur se do të jem ministër i Brendshëm, është tjetër kush që e ka thënë këtë, dhe duhet të na i thotë sot Monika Kryemadhi, pasi nga Shkodra në Sarandë, thuhet se ministri i Brendshëm, do të ishte grua nga rradhët e LSI.
Në 45 ditë fushatë në Elbasan, Monika Kryemadhi ishte vetëm gjysëm dite atje, madje Kryemadhi nuk i doli për zot as strukturave të LSI kur ishin në presionin e bandave, që unë e kam denoncuar”, tha Bardhi.
Ai u shpreh se nuk ka frikë të përballet me drejtësinë për çdo çështje, ndërsa ftoi Kryemadhin që nëse ka dyshime, mund ti drejtohej organeve të drejtësisë dhe të denonconte.
