Dy persona janë arrestuar nga policia e Lezhës pasi në automjetin me të cilin lëviznin janë gjetur 30 kallëpe me lëndë eksplozive.
Agron Manuka, 42 vjeç, banues në Durrës dhe Imer Losha 46 vjeç, banues në Dibër, janë vënë në pranga.
Sipas bluve, dy të arrestuarit do ti shisnin lëndët plasëse.
Aksioni
Policia njoftoi se bazuar në informacionet e marra në rrugë operative se disa shtetas që po qarkullonin me mjet nga Miloti në drejtim të Shkodrës, dyshohej se po transportonin lëndë eksplozive, u organizua dhe u finalizua operacioni policor i koduar “Pllana”.
Në kuadër të këtij operacioni, në aksin e vjetër Milot-Lezhë, në fshatin Pllanë, shërbimet e Policisë kanë identifikuar mjetin e dyshuar dhe kanë bërë të mundur ndalimin e tij.
Gjatë kontrollit të automjetit me drejtues Agron Manukan dhe dhe pasagjer Imer Loshën, Policia gjeti dhe sekuestroi në cilësinë e provës materiale: 30 kallëpe në formë cilindrike me lëndë eksplozive C-4, 17 kapsolla detonatore, 2 aparate celulare të lidhura me përcjellës elektrik, gati për t’u montuar me mina me telekomandë, si dhe një automjet.
Agron Manuka dhe Imer Losha u arrestuan.
“Nën drejtimin e Prokurorisë, vijon puna për dokumentimin e plotë ligjor të kësaj veprimtarie kriminale dhe identifikimin e personave të tjerë të përfshirë në të, ndërsa materialet do t’i kalojnë Prokurorisë pranë Gjykatës së Rrethit Gjyqësor Lezhë, për veprime të mëtejshme, për veprat penale ‘Prodhimi dhe mbajtja e armëve luftarake, armëve shpërthyese dhe municionit’ dhe ‘Trafikimi i lëndëve plasëse, djegëse, helmuese dhe radioaktive’, kryer në bashkëpunim”, njoftoi policia.
