Hetimi i 25 prillit/ Padia e Alibeajt për Lelin, reagon kryebashkiaku i Vlorës

Nënkryetari i PD, Enkelejd Alibeaj, që është njëherësh kryetar i Komisionit Hetimor për zgjedhjet e 25 Prillit, u shpreh sot se do të padisë për shpërdorim detyre kryebashkiakun e Vlorës Dritan Leli, pasi ka refuzuar që të japë informacione.

Por Leli, në një reagim për Fax News, bën me dije se ai i ka kthyer përgjigje Kuvendit që prej datës 15 Nëntor, ku ka dhënë informacion në lidhje me numrin e të punësuarve, dhe si kanë ndryshuar shifrat përpara zgjedhjeve të Prillit.

Sipas Lelit në periudhën nga Janari në Prill të këtij viti ka pasur një rritje me 7% të numrit të punësuarve në Bashki.

LEXO EDHE  Nga plagosje tek përdorimi i lëndëve narkotike, 11 të arrestuar në Tiranë

Ndërkohë Leli ka dhënë përgjigje dhe për përfituesit e ndihmës ekonomike, që sipas Bashkisë janë të gjithë prezent në Shqipëri, dhe janë brenda kritereve për të marrë përkrahjen nga shteti.

Siç shihet dhe në dokumentet e siguruara nga Fax News, shkresa që Leli i ka nisur Kuvendit mban datën 15 Nëntor, duke rrëzuar kështu pretendimet e Alibeajt se nuk është dhënë përgjigje për Kuvendin.