Një sasi prej 41 kilogramë kanabis u sekuestruar mbrëmjen e djeshme nga policia e Durrësit, që arrestoi dy persona.
M.B., 40 vjeç dhe G.T., 40 vjeç, të dy banues në Nikël, u vunë në pranga. Ata lëviznin me një automjet ku u gjet droga.
“Shërbimet e Policisë, bazuar në informacionet e marra gjatë operacionit policor, në aksin rrugor Nikël-Tapizë, bënë lokalizimin dhe bllokimin e automjetit me të cilin dyshohej se transportohej lëndë narkotike. Nga kontrolli fizik i personave të arrestuar dhe i mjetit tip ‘Volkswagen’ në të cilin ata udhëtonin, u gjetën 4 thasë plastikë me lëndë narkotike të dyshuar kanabis sativa, me peshë 41 kilogramë. Në cilësinë e provës materiale u sekuestruan lënda narkotike, automjeti dhe 2 aparate celulare”, njoftoi policia.
Në bashkëpunim me Prokurorinë vijon puna për identifikimin dhe kapjen e personave të tjerë të implikuar në këtë veprimtari kriminale, ndërsa materialet i kaluan Prokurorisë, për veprime të mëtejshme, për veprën penale “Prodhimi dhe shitja e lëndëve narkotike”, shtuan të njëjtat burime.
