Shmangia e tatimeve/ Arrestohen 6 administratorë dhe menaxherë biznesesh në Tiranë, sekuestrohen mallra me vlerë 1 mln euro

Gjashtë 6 administratorë dhe menaxherë biznesesh në Tiranë janë arrestuar për mallra kontrabandë. Ata akuzohen se kishin krijuar një skemë për tregtimin dhe transportimin e produkteve që futen dhe dalin nga Shqipëria, duke mos iu nënshtruar regjimit doganor dhe për rrjedhojë tregtohen duke shmangur detyrimet tatimore.

Në pranga u vunë Anxhela Dauti, 30 vjeçe, Manol Lekaj, 34 vjeç, Bruno Sanija, 37 vjeç Eduard Gjura, 38 vjeç, Kejvi Sulaj, 25 vjeç dhe Bledar Çela, 44 vjeç (të gjithë me banim në Tiranë), administratorë dhe menaxherë të subjekteve të ndryshme. Ata akuzohen për veprat penale “Tregtimi dhe transportimi i mallrave që janë kontrabandë”, ”Ruajtja dhe depozitimi i mallrave kontrabandë”, kryer në bashkëpunim “Fshehja e të ardhurave” dhe “Shkelja e të drejtave të pronësisë industriale”.

Hetimet

Operacioni i koduar “ FAST DELIVERY” u kryer nga Seksioni për Hetimin e Krimit Ekonomik dhe Financiar në Drejtorinë Vendore të Policisë Tiranë, nën drejtimin e Prokurorisë së Rrethit Gjyqësor Tiranë.

“Arrestimi i këtyre shtetasve është bërë pasi dyshohet se në bashkëpunim edhe me individë që nuk kishin regjistruar bizneset, por dhe me subjekte të tjera tregtare kishin krijuar një skemë për tregtimin dhe transportimin e produkteve që futen dhe dalin  nga  Shqipëria, duke mos iu nënshtruar regjimit doganor dhe për rrjedhojë tregtohen duke shmangur detyrimet tatimore. Nga veprimet hetimore të kryera ka rezultuar se mekanizimi i kësaj skeme ushtrohej fizikisht dhe nëpërmjet faqeve online si Instagram dhe Facebook, duke i shkaktuar një dëm të madh shtetit”, njoftoi policia.

LEXO EDHE  Bullgaria merr vendimin përfundimtar: Nuk e heqim veton për Maqedoninë e Veriut

Nga kontrolli që është kryer në këto subjekte, në bashkëpunim me Drejtorinë e Përgjithshme të Tatimeve, është konstatuar se shumë prej pakove me destinacion blerësin nuk ishin të pajisura me kupon ose faturë tatimore sipas legjslacionit përkatës.

Sipas të njëjtave burime, kjo skemë u mundësonte personave ose subjekteve tregtare që e zhvillonin konkurrencë të pandershme krahasuar me bizneset e rregullta.

Gjatë operacionit janë sekuestruar në cilësinë e provës materiale: 6 magazina, me një sasi malli të konsiderueshme të dyshuar kontrabandë dhe të papajisura me faturë tatimore; 300 lloje të ndryshme produktesh industriale (si: veshje, parfume, medikamente mjekësore, vegla dhe materiale ndërtimi të cilat kapin një vlerë afërsisht 1 milion euro); shuma monetare të cilat ishin përfituar nga shitja e produkteve.