Dy persona u arrestuan dhe një tjetër u shpall në kërkim, pasi policia konstatoi 57 refugjatë në një kamion.
Në pranga u vunë M.L., 36 vjeç; E.D., 28 vjeç, të dy banues në Korçë dhe u shpall në kërkim shtetasi A.O., 38 vjeç, banues në Tiranë.
“Shërbimet e policisë, në dalje të qytetit të Pogradecit, kanë kapur mjetin kamion tip ‘Iveco’, në pronësi të shtetasit A.O., me drejtues shtetasin M.L., brenda të cilit u konstatuan 57 emigrantë të paligjshëm, të cilëve kundrejt shpërblimit prej 1000 euro secilit, iu ishte premtuar kalimi drejt vendeve të BE-së. Nga veprimet e mëtejshme hetimore rezulton se, bashkëpunëtor në këtë veprimtari kriminale ishte edhe shtetasi E.D., i cili kryente kontrollin e rrugës, me mjetin tip ‘Benz’”, njoftoi policia.
Personat e vënë në pranga dhe i shpalluri në kërkim akuzohen për veprën penale “Ndihma për kalim të paligjshëm të kufijve”, kryer në bashkëpunim.
Operacioni u krye nga Komisariati i Policisë Pogradec, në bashkëpunim me strukturat për Hetimin e Krimeve në DVP Korçë, Policinë Kufitare dhe Policinë Rrugore.
