VIDEO-FOTO/ Ngjarja në Fier, protestë-marshim në Tiranë për mbrojtjen e fëmijëve

Një protestë-marshim po zhvillohet këtë të Premte me pikënisje nga sheshi në qendër të kryeqytetit, pas ngjarjes së ndodhur në Fieri, ku 38-vjeçari Klodian Çalamani vrau 8-vjeçarin Mateo Vasia.

Protestuesit mbanin pankarta në duar me mesazhe për mbrojtjen e fëmijëve.

“Stop abuzimit me fëmijët”, “dhuna ndaj fëmijëve është krim, denoncoje”, “mbro të drejtat e fëmijëve”, “miratoni regjistrin (për të dënuarit për krime seksuale), ishin disa nga mbishkrimet në pankarta që mbanin në duar protestuesit, kryesisht të rinj.

Ditën e djeshme, gjykata e Fierit dha në mungesë masën e sigurisë “arrest me burg” për Klodian Çalamanin. Shkak u bë situata e tensionuar përrreth gjykatës, ku përveç familjarëve të fëmijës, ishin grumbulluar dhe qytetarë të ndryshëm. Forca të shumta policia u përfshinë pranë objektit pasi u tentua dhe hyrja me forcë në mjediset e gjykatës.

LEXO EDHE  Apeli lë në fuqi dënimin për Shullazin dhe anëtarët e tjerë të grupit

Avokati i caktuar nga shteti për të përfaqësuar Çalamanin, u tërhoq pak para seancës, ndërsa i akuzuari, u mbajt në mjediset e paraburgimit dhe nuk u dërgua në gjykatë për të shmangur një përkeqësim të gjendjes.

Të revoltuar, familjarët kanë kërkuar me ngulm që për vrasësin të jepet dënimi me vdekje, i cili që nga mesi i viteve ’90 nuk është më pjesë e legjislacionit shqiptar. Madje, nisën të mbledhin firmat edhe për një peticion që kërkon dënim kapital për autorin.

Ngjarja ka tronditur opinionin dhe ka nxitur debate të shumanshme. Policia e arrestoi pak orë pas vrasjes autorin, i cili pohoi krimin. Ai ishte fqinj me fëmijën të cilit i mori jetën. Vite më parë, ai ishte dënuar për rrëmbimin e një tjetër të miture dhe njihej si njeri me probleme në komunitet.