Deputeti demokrat i Elbasanit, Luçiano Boçi, i është përgjigjur akuzave të hedhura nga Sekretari i Përgjithshëm i PD-së Gazmend Bardhi, se delegatët e Kuvendit në këtë qark votuan nën presion pro “Foltores”.
“Një grup kriminal, më i rrezikshme në Elbasan është angazhuar në mbledhjen e firmave. Ka pasur zyrtare të PD dega Elbasan që janë thirrur në rezidencën e Suel Çelës dhe i është vënë përpara formulari për të nënshkruar për thirrjen e Kuvendit”, u shpreh Bardhi.
Përmes një postimi në FB, Boçi thotë se një presion i tillë nuk ka ndodhur dhe se demokratët e Elbasanit kanë votuar me vullnetin e tyre të lirë, jo vetëm në këtë rast, por asnjëherë.
“Demokratët e Elbasanit dhe kur kanë firmosur dhe kur jo, kanë shprehur vullnetin dhe bindjen e tyre, larg çdo presioni apo miklimi të çfarëdolloji. Të hedhësh hije dyshimi mbi ata që përballuan me guxim masakrën zgjedhore të 25 prillit, për më tepër për guximin e tyre, është e pandershme dhe politikisht jo korrekte”, shkruan Boçi në një reagim në rrjetet sociale.
“Unë jam përulur me respekt dhe do vazhdoj të jem falenderues për punën dhe sakrificën sublime të tyre! Mua dhe të tjerët na ulën në parlament vota dhe mundi i atyre që kanë firmosur dhe atyre që nuk kanë firmosur për Kuvendin e 11 Dhjetorit. Asnjë gjykim dhe paragjykim për askënd! Vetëm borxh ndaj tyre, falenderime e bekime! Pa ATA s’ka fitore! Pa ATA s’ka bashkim! Pa ATA s’ka PD”, shton ai.
