Një 32-vjeçar u arrestua lidhur me ngjarjen e djeshme në Kamzë, ku pati të shtëna me armë zjarri.
Esat Selimaj akuzohet se për motive të dobëta, qëlloi me pistoletë për ta vrarë një shtetas, pas një konflikti të çastit. Policia gjeti dhe sekuestroi armën e zjarrit pistoletë me të cilën dyshohet se 32-vjeçari qëlloi në drejtim të një 23-vjeçari.
Esat Selimaj, 32 vjeç, banues në Kamzë, u arrestua për veprat penale “Vrasja me dashje” e mbetur në tentativë dhe “Armëmbajtja pa leje”.
“Ky shtetas, në bulevardin ‘Nënë Tereza’, në Kamzë, dyshohet se ka qëlluar për motive të dobëta, me armë zjarri në drejtim të shtetasit I.I., 23 vjeç, banues në Bathore, i dënuar më parë për vjedhje. Esat Selimaj, në një distancë rreth 50 metra, ka qëlluar me armë zjarri pistoletë në drejtim të shtetasit I.I., i cili në momentet e para, nuk e ka deklaruar këtë fakt në Polici. Shërbimet e Policisë, gjatë këqyrjes së vendit të ngjarjes, kanë gjetur dhe sekuestruar një gëzhojë dhe më pas gjatë arrestimit të Esat Selimajt, kanë gjetur dhe sekuestruar edhe armën e zjarrit pistoletë me fishekë luftarak”, njoftoi policia.
