Një i ri është arrestuar nga policia e Tiranës pasi është kapur duke transportuar refugjatë. 18-vjeçari, i cili ishte nën arrest shtëpiak, është vënë në pranga nga policia. Lidhur me ngjarjen është shpallur në kërkim bashkëpunëtori i 18-vjeçarit, një 27-vjeçar, i cili ka arritur ti arratiset policisë.
Aksioni
“Specialistët e Sektorit për Hetimin e Narkotikëve dhe Trafiqeve të Paligjshme në DVP Tiranë, në bazë të informacioneve të siguruara në rrugë operative, se disa persona, në bashkëpunim me njëri-tjetrin, kryenin transportin e emigrantëve të paligjshëm, kundrejt shpërblimit monetar, nga Tirana në drejtim të Kukësit, me mjete të marra me qira, në bashkëpunim me Sektorin e Forcës së Posaçme ‘Shqiponja’ dhe Komisariatin e Policisë Krujë, finalizuan operacionin policor të koduar ‘Krasta’”, njoftoi policia këtë të Enjte.
“Në kuadër të këtij operacioni u bë arrestimi në flagrancë i shtetasit A.M., 18 vjeç, i cili ishte me masë sigurimi personal ‘Arrest në shtëpi’, e caktuar nga Gjykata e Rrethit Gjyqësor Krujë, për veprat penale ‘Prodhimi dhe shitja e narkotikë’ dhe ‘Nxitja për përdorimin e drogës’. Gjithashtu u shpall në kërkim bashkëpunëtori i tij, shtetasi I. Ç., 27 vjeç, i dënuar më parë për kryerjen e veprës penale ‘Falsifikimi i monedhave’”, shtuan të njëjtat burime.
Ata janë konstatuar nga shërbimet e Policisë, në rrugën Tiranë-Rinas, duke transportuar me një mjet fugon, 20 emigrantë të paligjshëm, me destinacion qytetin e Kukësit. Nga ana e shërbimeve të Policisë është bërë ndjekja e mjetit dhe më pas ndalimi i tij në zonën e liqenit të Krastës në qytetin e Krujës.
Policia konfirmoi arrestimin e 18-vjccarit, ndërkohë 27-vjeçari ka arritur të arratiset.
“Në bashkëpunim me Prokurorinë e Rrethit Gjyqësor Tiranë, vijon puna hetimore për dokumentimin e plotë të ngjarjes dhe identifikimin e personave të tjerë të implikuar në këtë aktivitet kriminal, ndërsa materialet procedurale i kaluan Prokurorisë së Rrethit Gjyqësor Tiranë, për veprën penale ‘Ndihma për kalim të paligjshëm të kufijve’, kryer në bashkëpunim”, njoftoi më tej policia.
