Kryetari i Partisë Demokratike, Lulzim Basha ka reaguar lidhur me ngjarjen e djeshme të ndodhur në Fier, ku 8-vjeçari Mateo Vasiu u vra nga 38-vjeçari Klodian Çalamani.
Basha shprehet se ngjarja është një kambanë alarmi për të gjitha strukturat e shtetit shqiptar, policinë, drejtësinë, shëndetësinë e kujdesin social.
“Jam thellësisht i tronditur për ngjarjen e tmerrshme kriminale që i mori jetën një 8 vjeçari në Fier. Si prind, ndaj sot dhimbjen me prindërit dhe familjarët e Mateos dhe lus Zotin t’ua lehtësojë dhimbjen! Ngushëllimet më të ndjera familjes dhe të afërmve”, shkruan Basha në një postim në rrjetet sociale.
“Dita e djeshme, e cila jo për herë të parë na përballi me ngjarje të rëndë kriminale, është një kambanë alarmi për të gjitha strukturat e shtetit shqiptar, për policinë, drejtësinë, shëndetësinë e kujdesin social. Duhet një vëmendje e shtuar ndaj çdo rasti, një strategji e re përballjeje përtej propagandës, që ngjarje të tilla të parandalohen pa qenë vonë”, shton ai.
