Bashkim të demokratëve, e ka cilësuar Kryetari i PD-së, Lulzim Basha, Kuvendin Kombëtar të kësaj partie, i cili sipas tij, do të mblidhet më 18 dhjetor.
Në takimin me kryetarët e degëve të PD-së në rrethe, Basha u shpreh se beteja mes demokratëve i shërben vetëm Edi Ramës.
“Edi Rama është kundërshtari ynë i vetëm, ndaj beteja me njëri-tjetrin, mes nesh, i shërben vetëm atij”, është shprehur Basha.
Nga raportimet mësohet se në takimin me 71 kryetarët e degëve të PD, Basha ngriti shqetësimin për qëndrimet anti statutore të Sali Berishës, për të cilin tha se nuk njeh asnjë vendimmarrje.
“Kjo histori e perdorimit te demokratëvë si mburoje e interesave personale te kujdo merr fund njehere e pergjithmone. Kryesia e Partisë Demokratike votoi për mbledhjen e Kuvendit legjitim. Sali Berisha thotë se prap nuk e njeh. Ku qëndron morali i statutit që me forcë ngre Sali Berisha? Cfarë po kërkon ai? Sali Berisha nuk e ka hallin te statuti Ai nuk njeh asnjë strukturë të Partisë, sepse qëllimi i tij është që partia të shndërrohet në një mburojë të tij përballë Shteteve të Bashkuara”, ka thënë Basha.
Kreu demokrat përforcoi argumentin se Sali Berisha e kishte justifikim nisjen e foltores me qëndrimin se vendimi për të nuk ishte marre nga forumet.
“Pse nuk e përmend më Sali Berisha faktin me të cilin nisi foltoren, sepse nuk u votua në Kryesi? Sepse ky ishte një justifikim. Ja ku është vendimi i Kryesisë me 28 vota pro për mbledhjen e Kuvendit, dhe ai përsëri thotë s’e njoh. Është e qartë se sido që të merrej ai vendim, me çfarëdo votimi, Sali Berisha dëshmon se nuk do ta njihte. Sepse sot ai nuk njeh asnjë organ zyrtar te PD”, ka thënë ai.
