Në Bruksel u bisedua edhe për moslejimin e pjesëmarrjes së boksierëve kosovarë në Botërorin në Beograd

Zëvendëskryeministri i Kosovës, Besnik Bislimi, në takim sot me Përfaqësuesin special të BE-së për dialogun Kosovë – Serbi, Miroslav Lajçak, në Bruksel ka biseduar rreth gjendjes së zbatimeve të marrëveshjeve të arritura në kuadër të dialogut.

Siç është njoftuar nga Zyra e Kryeministrit, thuhet se është biseduar për çështjen e personave të zhdukur me forcë gjatë luftës në Kosovë.

Ndërsa është hapur edhe çështja që iu mohua boksierëve kosovarë pjesëmarrja në Botërorin në Beograd. Delegacioni i Kosovës nuk u lejua të futej në Serbi ndonëse tri herë tentoi të bënte këtë.

“Delegacioni i Kosovës ngriti shqetësim të madh për rastin e fundit, kur Serbia si organizatore e Kampionatit Botëror të Boksit, ka shkelur të drejtën e sportistëve dhe të Federatës së Boksit të Kosovës, për pjesëmarrje në Kampionatin Botëror të Boksit, siç është e përcaktuar me rregullat e organizatave ndërkombëtare të sportit. Ndalesa e bërë ekipit përfaqësues të boksit duke mos ua lejuar hyrjen në Serbi për të marrë pjesë në Kampionatin Botëror të Boksit, që mbahej në Beograd, nga delegacioni kosovar u theksua si veprim i palës serbe që është plotësisht në kundërshtim me frymën e lëvizjes së lirë, që promovohet përmes marrëveshjes së Brukselit në raport bilateral me Serbinë”, thuhet nga Zyra e Kryeministrit.

LEXO EDHE  Akuzohet se kishte vënë në dispozicion lokalin për lojëra fati, arrestohet pronari në Tiranë

Gjithashtu pala kosovare ka cekur edhe pengesat e shkaktuara nga autoritetet serbe në transferimin e mjeteve për Luginën e Preshevës.

“Gjithashtu, shqetësim tjetër i ngritur janë pengesat e shkaktuara nga autoritet serbe në transferin e mjeteve për Luginë e Preshevës. Nga pala kosovare u kërkua facilitim shtesë nga BE-ja, veçanërisht duke pasur parasysh domosdoshmërinë e një zgjidhje të qëndrueshme afatgjatë, mëqenëse nga Ministria e Financave dhe Transfereve të Republikës së Kosovës janë planifikuar dy milionë euro për Luginën e Preshevës në buxhetin e vitit të ardhshëm”, thuhet nga Zyra e Kryeministrit.