Tre persona janë arrestuar nga policia e Tiranës pasi akuzohet se shpërndanin drogë në kryeqytet.
Dy prej të arrestuarve janë vëllezër dhe sipas bluve shpërndanin kanabis, ndërsa i treti i cili punonte si taksist, shpërndante kokainë.
“Griseld Halilaj, 25 vjeç dhe Arnold Halilaj, 20 vjeç, vëllezër, në bashkëpunim me njëri-tjetrin siguronin sasi të konsiderueshme të lëndës narkotike cannabis sativa dhe më pas e shisnin atë në doza të vogla, në zona të ndryshme të Tiranës. Gjatë kontrollit fizik të ushtruar nga shërbimet e Policisë, këtyre shtetasve iu gjet e iu sekuestrua në cilësinë e provës materiale lëndë e dyshuar cannabis sativa, 1 peshore elektronike, fishekë luftarakë, 1 dorezë metalike (përforcues grushti), dy aparate celularë, 1 patentë dhe kartë ID të dyshuara të falsifikuara”, njoftoi policia.
Personi tjetër i vënë në pranga është Erion Jasharllari, 39 vjeç, i cili sipas bluve, merrej me shitje të lëndës narkotike të llojit kokainë në zona të ndryshme të Tiranës, duke e kamufluar aktivitetin e tij kriminal, me një mjet taksi që kishte në përdorim.
“Gjatë kontrollit fizik nga shërbimet e Policisë, këtij shtetasi iu gjetën doza me lëndë narkotike kokainë dhe një shumë parash, të cilat u sekuestruan në cilësinë e provës materiale bashkë me mjetin”, njoftoi policia.
Akuzat penale që rëndojnë ndaj të arrestuarve janë: “Prodhimi dhe shitja e narkotikëve”, “Falsifikimi i letërnjoftimeve, i vizave ose i pasaportave”, “Mbajtja pa leje e armëve të ftohta” dhe “Mbajtja pa leje e municionit luftarak”.
