Dy persona janë arrestuar nga policia e Tiranës pasi akuzohet se po ndihmonin disa refugjatë kundrejt shpërblimit monetar, për të dalë ilegalisht nga kufijtë e vendit.
Në pranga u vunë: L.B., alias K.K., 34 vjeç dhe E.M., 30 vjeç, i dënuar më parë për veprën penale “Vrasje mbetur në tentativë”, të dy banues në Tiranë. Po ashtu, u shpall në kërkim M.D., 36 vjeç.
“Shtetasit e mësipërm janë kapur nga shërbimet e policisë, në afërsi të një qendre tregtare, duke transportuar me një mjet fugon, 7 emigrantë të paligjshëm, të cilëve kundrejt shpërblimit monetar, iu kishin premtuar kalimin drejt vendeve të BE-së. Në vijim të veprimeve nga specialistët për Hetimin e Trafiqeve të Paligjshme në DVP Tiranë u proçeduan penalisht dhe 7 shtetasit e huaj për veprën penale ‘Kalim i paligjshëm i kufiri’”, njoftoi policia.
“Po punohet për dokumentimin e plotë të ngjarjes dhe identifikimin e personave të tjerë të implikuar në këtë aktivitet kriminal, ndërkohë, materialet proçeduriale i kaluan Prokurorisë së Rrethit Gjyqësor Tiranë për veprat penale ‘Ndihma për kalim të paligjshëm të kufijve’, kryer në bashkëpunim dhe ‘Kalim i paligjshëm i kufirit’”, shtuan të njëjtat burime.
