Edhe pse raportohet se kishte shanse të mira për të përfituar ulje dënimi, ai ka refuzuar. Arsyeja? Seancat gjyqësore i japin stres.
Rasti i pazakontë vjen nga italian fqinje dhe protagonisti është 31-vjeçari shqiptar Genard Llanaj, i dënuar për vrasjen me armë zjarri të një senegalezi, në vitin 2018.
Sipas mediave italiane, Genard Llanaj, i cili ndodhet pas hekurave pas një dënimi të marrë me 16 vite burgim në shkallë të parë, kishte mundësi të apelonte dhe me shumë mundësi të përfitonte ulje dënimi. Por, ai ka refuzuar.
Raportohet se Llanaj i ka dërguar një kërkesë me shkrim avokates dhe familjarëve, duke refuzuar apelimin.
Në kërkesë 31-vjeçari ka arsyetuar se seancat gjyqësore i shkaktojnë stres dhe në këtë mënyrë, ka vendosur të mos apelojë vendimin.
Ai është shprehur se nuk e duron dot idenë për të përballuar tensionin dhe stresin e gjyqit. Seancat e bëjnë atë të sëmurë fizikisht, bëjnë që të rishfaqen kujtime të dhimbshme, frikëra irracionale dhe të çlirojë paranojën e tij të hershme.
Në seancën e dënimit të Llanajt në vitin 2019, gjykata njohu kërkesën e avokates, se i pandehuri ka “dobësi të pjesshme mendore”. Sipas saj, mbrëmjen e vrasjes, gjendja e tij psikofizike ishte ndryshuar nga përdorimi i rëndë i kokainës që kishte bërë prej disa kohësh. Genard Llanaj e qëlloi senegalezin i cili ishte ulur në një stol pa pasur asnjë konflikt me të. “Nuk e dija kush ishte. E qëllova sepse doja ta trembja! Mu duk sikur ishte shqiptar, nga ata që kanë ardhur për të larë hesapet e vjetra që kam nga Shqipëria”, u shpreh ai pas krimit.
