Artur Balla, kunati i Rezart Taçit, është një prej personave që u arrestua me urdhër të SPAK, pasi dyshohet se është i përfshirë në një skemë të pastrimit të parave.
Biznesmeni Taçi është shpallur në kërkim nga SPAK, në bashkëpunim me Interpol, pasi nuk është arritur të kapet.
Balla, është djali i gjyqtares së Tiranës Dhurata Balla, e cila dha dorëheqjen nga detyra, pasi KPK i la asaj barrën e provës për justifikimin e pasurisë, gjatë procesit të Vetingut.
Dhurata Balla e nisi karrierën në sistemin e drejtësisë në vitin 2000 dhe ka punuar deri në vitin 2013 si gjyqtare në Gjykatën e Krujës. Prej vitit 2013, ajo e ushtroi funksionin në Gjykatën e Tiranës, ndërkohë që në qershor të këtij viti, pasi refuzoi që të vazhdonte procesin e Vetingut, KPK e përjashtoi atë nga sistemi i drejtësisë për 15 vite.
SPAK në bashkëpunim me antimafian italiane kanë kryer një operacion kompleks, ku është zbuluar një grup kriminal që synonte pastrimin e parave në vendin tonë.
Të përfshirë në këtë skemë janë disa shtetas italian, zvicerian, dhe biznesmeni shqiptar Rezart Taçi. Mësohet se ky i fundit përmes dy të besuarve të tij Artur Balla dhe Bledar Lilo, ka dalë garant për futjen e 18 milionë eurove në vendin tonë, përmes një banke të nivelit të dytë, me qëllim pastrimin e tyre në vendin tonë, kundrejt përfitimit financiar.
SPAK ka lëshuar 3 urdhër arreste, dy prej të cilave janë ekzekutuar, ndërsa Taçi vetë nuk është mundur që të vihet dot në pranga.
Pasi këto para të futeshin përmes bankave në vendin tonë, transaksion që është kryer pjesërisht, synohej që të transferoheshin drejt shteteve të tjera.
Mediat italiane njoftonin sot se i është dhënë masa e arrestit të shtëpisë sipërmarrësit 90-vjeçar Francesko Zummo, kontabilisti Fabio Petruzzella dhe shtetasit Daniele Castagalli.
Francesco Zummo, 90 vjeç, nga Palermo, është i dyshuar si bashkëpunëtor i ish-kryebashkiakut mafioz Vito Ciancimino, i cili vdiq në vitin 2002.
Sipërmarresi italian Zummo dyshohej se fshihte një pjesë të pasurisë të ish-kryebashkiakut të Palermos dhe shoqëroi dy herë fëmijët e Cianciminos në Kanada, duke i ndihmuar në blerjen e pasurive të paluajtshme.
Ndërkohë mediat në Shqipëri kanë zbuluar detaje të reja lidhur nga dosja e SPAK-ut kundër biznesmenit Rezart Taçi.
Sipas hetimeve, njerëzit më të besuar të Taçit në skemë ishin Artur Balla dhe ish-shoqëruesi i tij, Bledar Lilo, të cilat janë arrestuar.
SPAK deklaron se nga hetimet e nisura këtë vit në bashkëpunim me autoritetet italiane kanë zbuluar organizimin dhe funksionimin e një operacioni kompleks financiar ndërkombëtar të kundërligjshëm, të shtrirë në disa shtete të ndryshme, që ka pasur si qëllim “pastrimin” e një shume monetare të konsiderueshme që përbën produkt të veprimtarisë kriminale.
Skema financiare është drejtuar nga dy italianët Francesco Zummo dhe I.Z., në bashkëpunim me një tjetër italian Fabio Petruzzella të zviceranit me origjinë italiane Daniele Castagalli si dhe të biznesmenit shqiptar Rezart Taçi i përfshirë në biznese në sektorin e naftës. SPAK thotë se Taçi në funksion të kryerjes së kësaj veprimtarie ka angazhuar dy bashkëpunëtorët e tij shqiptarë, Artur Balla dhe Bledar Lilo.
Pjesë e kësaj skeme financiare, me ndihmën e shqiptarëve të përfshirë, ka qenë edhe kryerja e disa veprimeve dhe transaksioneve bankare në një bankë të nivelit të dytë në Shqipëri, veprime të cilat janë realizuar vetëm pjesërisht sipas SPAK-ut dhe nuk është arritur që të realizohen plotësisht.
Po sipas SPAK-ut gjatë hetimeve janë mbledhur prova se ndihma në këtë rast për transferimin dhe fshehjen e shumës monetare është bërë kundrejt premtimit për marrjen e përqindjes së caktuar të përfitimit monetar, në raport me shumën monetare që është transferuar në Shqipëri dhe që do të vijonte të transferohej në vende të tjera.
