Drejtuesi i automjetit tip “Citroen” që u përfshi në një aksident në kryeqytet mëngjesin e kësaj të Enjteje, është vënë nën arrest nga policia.
Emirjan Doko, i cili ndodhet në spital në gjendje të rëndë pas përplasjes te “21 Dhjetori”, dyshohet se ka qenë i dehur në timon dhe është futur në kryqëzim me semafor të kuq.
Në makinë i është gjetur një pushkë qe e mbante pa leje, ndërsa me vete një thikë.
Makina që ai drejtonte tip “Citroen” u përplas me një “Honda”. Për pasojë, mbetën të vdekur shoferi dhe pasagjeri në mjetin tip “Honda” – Luan Cenollari dhe Ali Bejo, ndërsa 30-vjeçari Emirjan Doko u plagos.
“Specialistët e Qarkullimit Rrugor, në bashkëpunim me Komisariatin e Policisë Nr. 2, në përfundim të veprimeve për aksidentin e ndodhur mëngjesin e sotëm, bënë arrestimin në flagrancë të shtetasit Emirjan Doko, 30 vjeç, për veprat penale ‘Shkelja e rregullave të qarkullimit rrugore’, ‘Mbajtja pa leje dhe prodhimi i armëve, armëve shpërthyese dhe i municionit’ dhe ‘Prodhimi, mbajtja, blerja apo shitja pa leje e armëve të ftohta’”, njoftoi policia.
“Ky shtetas, rreth orës 03:20, në kryqëzimin ‘21 Dhjetori’, duke drejtuar mjetin “Citroen” është përfshirë në një aksident me mjetin ‘Honda’ me drejtues shtetasin Luan Cenollari, 58 vjeç. Si pasojë e aksidentit ka ndërruar jetë në vendngjarje pasagjeri në mjetin ‘Honda’, shtetasi Ali Bejo, 59 vjeç, ndërsa drejtuesi, shtetasi Luan Cenollari ka ndërruar jetë në spital. Drejtuesi i mjetit ‘Citroen’, Emirjan Doko, ndodhet në spital, në gjendje të rëndë”, shtuan të njëjtat burime.
Gjatë kontrollit të mjetit që drejtonte Emirjan Doko, shërbimet e Policisë gjetën dhe sekuestruan një armë zjarri pushkë, ndërsa gjatë kontrollit fizik këtij shtetasi iu gjet një armë e ftohtë (thikë), mbyllet njoftimi i bluve.