Nga Boldnews.al
Kryebashkiaku i Tiranës, Erion Veliaj po përgatitet për fushatën e pritshme për zgjedhjet e pjesshme lokale në Vorë, pas shkarkimit të Agim Kajmakut, i cili ishte në shkelje të ligjit ‘Për Dekriminalizimin”.
Ai ka nisur takimet në bazë dhe është mbështetur, ku më shumë se tek vetë Agim Kajmaku.
Veliaj ka qenë së fundmi në Vorë, ku ka prezantuar projektet ambicioze të Partisë së tij, ku natyrisht kryefjala janë “satelitët” dhe “ne bëjmë shtet”.
Dhe, Veliaj, këtë shtet ka zgjedhur ta bëjë me Kajmakun, si edhe me deputetin më të ri socialist, Orlando Rakipin, djalin e ish-deputetit Aqif Rakipi, i cili humbi gjithashtu mandatin për shkak të “Dekriminalizimit”.
Por, megjithëse me këto dy pesha të rënda në krah, Veliaj është munduar t’i fsheh në albumin e tij propagandistik të takimit në Vorë.
Në rrjetet sociale të administruara nga Bashkia e Tiranës, Agim Kajmaku, i dënuar edhe për “falsifikim formularësh”, shfaqet gjithnjë “i fshehur”.
Në disa raste ai është me kokë ulur, ndërsa në disa të tjera fsheh fytyrën pas pjesës së pasme të Veliajt.
Megjithatë, kryebashkiaku i Tiranës, si rrallëherë, ka dështuar të menaxhojnë deri në detaj daljet e tij publike.
Militantë të ekzaltuar nga prania e tre “kolosëve” në Vorë, kanë shkrepur foto, ku dallohen qartësisht Erion Veliaj, Agim Kajmaku dhe Orlando Rakipi.
Agim Kajmaku u emërua kryetar i Bashkisë së Vorës në votimet mono-partiake të 30 Qershorit 2019.
Por, shumë shpejt ai u largua nga pozicioni, pasi rezultoi se nuk kishte deklaruar të shkuarën kriminale në Greqi.
Për shumë njohës të politikës, fushata kundër Kajmakut nisi nga brenda radhëve të Partisë Socialiste, e sidomos nga ish-komisarja politike e qeverisë për zonën e Vorës, Belinda Balluku.
Tashmë, duket se Balluku e ka humbur garën brenda PS-së me Veliajn dhe ky i fundit nuk e ka aspak problem që ta mbajë Agim Kajmakun në krahun e tij të djathtë.
Ndërsa në të majtin ka Orlando Rakipin, të birin e Aqif Rakipit, i cili nga një personazh politik i panjohur, arriti ‘surprizën”, duke thyer herësin e duke fituar një vend në Parlament, megjithëse ishte në fund të listës së hartuar nga Edi Rama.
