Kryeministri Edi Rama foli këtë të Martë për incidentin në Qafë-Mollë të Shtunën, ku një gazetare dhe një operator u shtynë nga një efektiv policie duke rrezikuar të bien në humnerë.
Rama dënoi sjelljen e punonjësit të policisë, por evidentoi se ngjarja bëri bujë pasi personi i keqtrajtuar ishte gazetare.
“Për të ardhur keq që individë me uniformën e shtetit si ishte rasti i fundit i dikujt me uniforme që keqtrajtoi një gazetare jo se ishte gazetare, por se ishte gazetare ngjarja bë më e bujshme, por në thelb që keqtrajtoi një qytetare, hedhin hije mbi gjithë këtë punë, sakrifica dhe gjithë këto rezultate”, tha ai.
“Patjetër që çdonjëri prej jush, punonjësve të policisë së shtetit del nga shtëpia për të shkuar një fron të vështirë, se meriton që në punën e tij dhe në imazhin e uniformes që ai apo ajo veshin të ketë të tilla stërkala balte që vijnë nga shkelja e patolerueshme e vijës së sjelljes të punonjësve të policisë së shtetit”, shtoi Rama, gjatë një aktiviteti për prezantimin e projekt-buxhetit 2022 për Policinë e Shtetit.
“Dhe ndaj është e nevojshme të veprohet siç u veprua duke i larguar këta individë në mënyrë të menjëhershme nga policia, por edhe të theksohet nga ana e drejtuesve se figura e policit të shtetit s’ka nevojë për asnjë gjest dhe asnjë fjalë të tepërt se është mishërimi i ligjit dhe ligji nuk flet, nuk bërtet, nuk kërcënon, nuk shan, ligji vepron dhe në veprimin e ligjit është e tepërt të shtohen gjeste e të bëhen akte që faktikisht i ulin kokën atë ditë e nganjëherë edhe për disa ditë me radhë të gjithë punonjësve të policisë së shtetit, të cilët fatkeqësisht shihen të gjithë me atë sy për shkak të dikujt që se meriton të jetë kolegu apo kolegia e tyre”, shtoi ai.
