Komisioni i Ligjeve ka diskutuar sot projektbuxhetin për vitin e ardhshëm, për Institutin e Studimeve të Krimeve dhe Pasojave të Komunizmit. Diskutimi ka përkuar me 80 vjetorin e krijimit të Partisë Komuniste, e cila më pas u shndërrua në PPSH dhe pas viteve ’90, në Partinë Socialiste.
Deputeti demokrat Oerd Bylykbashi theksoi se Instituti nuk duhet të fokusohet vetëm në nxjerrjen në pah të krimeve të komunizmit, por edhe në drejtimin e gishtit drejt fajtorëve që janë ende gjallë, si dhe dënimi i tyre.
“Nuk duhet të fokusoheni vetëm te studimi i krimeve, por duhet të fokusohemi edhe te dënimi. Jo më rezoluta vetëm, por dënimi, se falje nuk ka për të pasur”, tha Bylykbashi. Në vijim ai shtoi se detyra e Institutit është të studioni dhe të nxirrni në pah krimet e komunizmit.
“Nëse duhet të ketë një prioritet që lidhet me atë që është pastrimi i ndërgjegjes së kësaj shoqërie nga krimet e komunizmit se komunizmi është më i gjerë, krimet janë pjesa më e zezë, bëhet fjalë për mijëra të vrarë, qindra të vrarë që nuk u gjenden eshtrat, me dhjetëra mijëra të burgosur dhe të internuar, unë gjykoj që instrumentet që vëmë ne në funksion të këtij procesi pastrimi, nëpërmjet nxjerrjes në pah të krimeve që më pas të kemi mundësinë të vëmë gishtin se ka ende fajtorë për ato krime.
Në atë kompetencë aq sa ka institucioni juaj, unë gjykoj se duhet të keni fokus dhe para më tepër. Ndërkohë që duhet të jetë prioritet i këtij Kuvendi që ta forcojë këtë.
Sot është përvjetori i 80-të i ditës që prodhoi krimet e komunizmit dhe ne nuk duhet të limitohemi vetëm te studimi i krimeve, por duhet të fokusohemi edhe te dënimi. Jo më rezoluta vetëm, por dënimi, se falje nuk ka për të pasur.
Po nuk u bë kjo do të mbetet plagë dhe jo njollë në ndërgjegjen e kësaj shoqërie dhe do të vazhdojmë të diskutojmë gjëra që gjenerohen nga dita që u themelua ajo parti”, tha Bylykbashi.
