Kryebashkiaku i Tiranës, Erion Veliaj, ka nisur fushatën për zgjedhjet e pritshme në Bashkitë e Vorës dhe Rrogozhinës, ku pritet të zhvillohen zgjedhjet e parakohshme për Kryetarët e Bashkive, për shkak se kanë në detyrë, kryetarë të komanduar.
Veliaj ka sulmuar Foltoren e ish-Kryeministrit Sali Berisha, të cilën e ka krahasuar me “cirkun në fshat”, ndërsa për LSI tha se është kthyer në një dyqan që ka ulur qepenat.
“Ne do të fitojmë në këto dy bashki, por edhe në Bashkitë e tjera ku do të mbahen zgjedhjet e parakohshme, pasi ne e kemi mendjen te qytetarët dhe hallet e tyre. Ato që janë përballë nesh e kanë mendjen te Foltorja, që është kthyer si cirku në fshat, nuk e kanë mendjen te qytetarët. LSI është bërë si dyqan që ka ul qepenin”, tha Veliaj, gjatë takimit me strukturat e PS në Vorë.
Gjithashtu ai tha se Luli largoi nga PD të gjithë ata që bllokonin punët e Bashkisë.
“Përdori çunin e Fahriut te Unaza e Madhe dhe pastaj e largoi. Përdori atë çunin e FRPD për të bllokuar projektin në Kombinat, tani e largoi. Përdori Albana Vokshin te shkolla Jeronim De Rada, dhe tani e largoi. Luli është njish, pasi i përdor këto, pastaj i hedh në rrugë, na pastron edhe rrugën neve”, tha Veliaj.
Kryebashkiaku në vijim sulmoi Presidentin Ilir Meta, për të cilin tha se uronte që ti kishte dalë pija dhe të zbatonte vendimin e Gjykatës Kushtetuese.
“Vendimi zbardhet për 45 ditë dhe pastaj 45 ditë ka afat Presidenti për të caktuar datën për zgjedhjet, koha është shumë e shkurtër. Uroj që Presidentit ti ketë dalë pija dhe të zbatojë vendimin e Kushtetueses”, tha Veliaj.
