Emiljano Musta ka qenë protagonisti i fitores së sotme të Partizanit ndaj Kastriotit dhe ka pranuar se për ekipin, fitorja më në fund ishte çlirim. Ai ka shpjeguar për “SuperSport” se situata në renditje është e qartë për të gjithë, por nuk ka konflikte brenda ekipit, ashtu si edhe se lojtarët e dinë se çfarë duhet të bëjnë për të kthyer ekipin ku synohet, duke kujtuar si shembull pikërisht ekipin e Tiranës.
“Nuk ka ndryshuar asgjë, por duke parë edhe terrenin e kundërshtarin e kishim përgatitur ndeshjen që do kishte duele të luftuara. Fusha nuk ishte e mirë për të luajtur topin shpejt. Iu përshtatëm kundërshtarit dhe kishim dëshirë të shtuar për të fituar se na duheshin patjetër tre pikët.
Nuk kisha studiuar Salin për golin, edhe pse e njoh se e kam patur në ekip te Flamurtari e Laçi. Ishte skemë që e kishim punuar në stërvitje dhe fatmirësisht rezultoi e duhura dhe arrita të shënoj.
Të gjithë e dimë renditjen, kemi bërë hapa të gabuar në fillim të sezonit, por do të doja të merrja një shembull. Te Kukësi kam qenë 12 pikë pa me Tiranën në fillim të sezonit dhe Tirana u shpall kampion. Ne do të shohim ndeshjet një nga një, kemi favor që kemi ndeshje radhazi në shtëpi dhe vëmendja jonë është e gjitha te Laçi tashmë.
Normalisht që pas tre pikëve gjendja është akoma më e mirë dhe ekipi është më i gëzuar, por ju siguroj që në dhomat e zhveshjeve me trajnerin e lojtarët nuk ka asnjë lloj problemi. Jemi të gjithë të bashkuar për një qëllim, jemi të gjithë punonjës të Partizanit dhe japim maksimumin për fanellën e për tifozët që na ndjekim në tribuna duam t’ua shpërblejmë më së miri duke arritur fitoren dhe duke siguruar tre pikët”, tha Musta.
