Ish-ministri i Brendshëm, Fatmir Xhafaj, aktualisht deputet i PS nuk pranoi të firmoste nismën kushtetuese të propozuar nga Partia Socialiste për zgjatjen e mandatit të organeve të vettingut.
Gjatë mbledhjes së përbashkët të Këshillit për Legjislacionin dhe Komisionit për Çështjet Ligjore ku po diskutohet nisma e mazhorancës për ndryshime kushtetuese që do të zgjasnin afatin e mandatit të organeve të vetingut Xhafaj u shpreh se duhet një analizë e detajuar para se të merret një vendim.
Sipas tij, analiza do t’i shërbejë edhe publikut për të pasur besim pasi mbi procesin janë hedhur shumë dritëhije.
‘Ky është një rast i mirë për të gjykuar për këtë proces. Në këndvështrimin tim, gjithë kjo procedurë, ka të nevojshme që të na çojë në një analizë të plotë të situatës aktuale në procesin që jemi. Propozimi i kolegëve deputetë është i mjaftueshëm për të vënë në lëvizje procesi parlamentar, deri këtu jemi në rregull. Përgjegjësia jonë është që përmes këtij diskutimi kaq të gjerë që na imponon Kushtetua dhe rregullorja të marrim një vendim i cili të jetë jo një vendimmarrje teknike, por një vendimmarrje që i jep legjitimitet vazhdimit të këtij procesi’, tha Xhafaj.
Gjithashtu ai u shpreh se kjo kërkon një analizë të plotë të situatës aktuale ku jemi në këtë proces.
‘Së pari faktet konkrete të zhvillimit të këtij procesi. Cilat janë çështjet e mbyllura me vendimmarrje konkrete dhe cili është statusi për të kuptuar ecurinë e këtij procesi. Për një moment jemi dakord, themi do miratohet. Por pse 2 vjet e gjysmë dhe jo 3 vjet e gjysmë ? pse jo 1 vit e gjysmë që do të ishte akoma më mirë. Të gjitha këto e kanë të nevojshme që të kemi një analizë të kësaj natyre që të themi ky ishte vendim i drejtë. Kjo është në interes edhe të besimit të publikut sepse mbi procesin janë hedhur shumë dritëhije. Të gjitha këto rrethana e bëjnë të domosdoshme që ne të ndërtojmë një analizë që të na japë cilat janë problemet dhe shqetësimet’, deklaroi ish-ministri socialist.
Ndërsa shtoi më tej se është i pakënaqur me ritmin e punës KPK-së dhe ONM-së në këtë proces.
“Personalisht jam shumë i pakënaqur nga ritmi i punës së KPK-së dhe ONM-së në këtë proces. Cilat janë garancitë që s’do vijmë prapë këtu pas 2 vjetësh e të themi a e shtyjmë prapë?” tha ai.
