Ish-ministri i Mbrojtjes, Fatmir Mediu ka dorëzuar në Gjykatën e Lartë kërkesën për rekurs ndaj vendimit të Gjykatës së Posaçme të Apelit që pranoi kërkesën e SPAK për heqjen e pezullimit dhe rinisjen e gjykimit për tragjedinë e Gërdecit.
Mediu kërkon nga Gjykata e Lartë rrëzimin e vendimit të Gjykatës së Posaçme të Apelit.
Apeli i Gjykatës së Posaçme ktheu për rigjykim dosjen në ngarkim në ish-ministrit të Mbrojtjes Fatmir Mediu, lidhur me shpërthimin e ndodhur në Gërdec në vitin 2008.
Në muajin Mars, SPAK kërkoi rinisjen e gjykimit për Mediun pasi kallëzimit të familjarëve të një 6-vjeçari i cili humbi jetën gjatë shpërthimit. SPAK argumentoi se tanimë Mediu nuk ka imunitet, sikurse kur ndodhi ngjarja dhe mund të hetohet.
Megjithatë, kërkesa e prokurorisë u rrëzua nga Gjykata e Posaçme që argumentoi se prokuroria ka pasur të gjitha mundësitë që ta hetonte lirisht Fatmir Mediun pasi që prej 2012 ai nuk ka pasur imunitet, por nuk e bëri dhe në këto kushte vepra është parashkruar.
SPAK ankimoi vendimin në Apelin e Gjykatës së Posaçme, që më 24 Shtator rrëzoi vendimin e shkallës së parë dhe vendosi rinisjen e gjykimit, “duke i kthyer aktet Prokurorit të Posaçëm për të proceduar”.
Javën e kaluar, Prokuroria e Posaçme njoftoi se ka regjistruar procedim penal ndaj ish-ministrit Fatmir Mediu, për veprat penale: “Shpërdorim i detyrës”, kryer në bashkëpunim, si dhe “shpërdorim i detyrës” në bashkëpunim me subjekt ushtarak, kuadër komandues.
