Dhjetë persona janë arrestuar këtë Premte nga policia lidhur me një tender të Bashkisë Durrës, për të cilën hetuesit kanë gjetur parregullsi.
Personale e vënë në pranga janë punonjës së bashkisë Durrës, si dhe administratorë, ortakë e punonjës të shoqërive “R&R Group sh.p.k.” dhe “Klosi – R Company sh.p.k.”.
Ndaj tetë prej të arrestuarve është vendosur nga Gjykata e Posaçme me kërkesë të SPAK, masa e arrestit me burg. Ndaj dy shtetasve është vendosur përkatësisht arrest shtëpie dhe detyrim paraqitje. Masa që janë ekzekutuar këtë të Premte nga policia.
Hetimet
Prokuroria e Posaçme Kundër Korrupsionit dhe Krimit të Organizuar Tiranë, njofton se pasi ka kryer hetime në kuadër të procedimit penal nr. 25 të vitit 2021, në bashkëpunim me Drejtorinë Hetimore të Drejtorisë së Përgjithshme të Policisë së Shtetit, ka arritur të sigurojë prova të mjaftueshme, të cilat krijojnë dyshimin e arsyeshëm, se:
Në procedurën e prokurimit me REF-57495-05-06-2020, të zhvilluar nga Bashkia Durrës, në periudhën maj – qershor 2020, me vlerë të fondit limit prej 7 083 000 lekë (pa TVSH), janë evidentuar shkelje ligjore, te kryera nga shtetasit Adriatik Velaj, Muhamet Likazhiu dhe Artan Taho me cilësinë e anëtarit të grupit të specifikimeve teknike dhe përllogaritjes së vlerës së fondit limit, pranë Bashkisë Durrës, të cilat formojnë elementët e veprës penale të “Shpërdorimit të detyrës”, dhe nga shtetasit Kastriot Beqaraj, Gjergj Markola, Indrit Matmuja me cilësinë e anëtarit të Komisionit të Vlerësimit të Ofertave, pranë Bashkisë Durrës, të cilat formojnë elementët e veprës penale të ‘Shkeljes së barazisë së pjesmarrësve në tendera apo ankande publike’ kryer në bashkëpunim.
Gjithashtu është krijuar dyshimi i arsyeshëm se, shtetasit Albion Bushi, Elona Rami, Lulzime Rami dhe Riza Sulaj, administratorë, ortakë dhe punonjës të shoqërive R&R Group sh.p.k. dhe Klosi – R Company sh.p.k., kanë konsumuar veprën penale të “Falsifikimit të dokumentave” në bashkëpunim, duke dorëzuar dokumenta të falsifikuara në kuadër të kësaj procedure prokurimi.
Janë regjistruar si persona nën hetim, për veprën penale të “Falsifikimit të dokumentave” edhe shoqëritë R & R Group sh.p.k., Klosi – R Company sh.p.k. dhe Ra – Mi Kompani sh.p.k., subjekte për të cilat vijojnë hetimet, përsa i përket procedurave të tjera të prokurimit ku këto subjekte kanë qenë pjesmarrëse.
Masat
Bazuar në kërkesën e Prokurorisë së Posaçme, Gjykata e Posaçme e Shkallës së Parë Për Korrupsionin dhe Krimin e Organizuar Tiranë, me vendimin datë 28.10.2021, ka vendosur: Caktimin e masës së sigurimit “arrest në burg” për tetë nga të arrestuarit; “arrest në shtëpi” për shtetasen Lulzime Rami dhe “detyrim për t’u paraqitur në policinë gjyqësore” për Elona Ramin.
Ekzekutimi i masave të sigurimit nga policia gjyqësore pranë Drejtorisë Hetimore, Drejtoria e Përgjithshme e Policisë së Shtetit, u bë i mundur këtë të Premte.
Faksimile e formularit të njoftimit të fituesit të tenderit
