Aktori amerikan Alec Baldwin qëlloi me armë zjarri dhe vrau aksidentalisht një kineaste e plagosi regjisorin teksa po xhironin një film në New Mexico. Incidenti ndodhi në xhirimet e filmit “Rust”.
Motra e kineastes që mbeti e vrarë në sheshxhirim, ka folur mes dhimbjes dhe tha se ishte shumë krenare për motrën e saj.
“Nuk mund ta kuptoj vdekjen e saj. E doja shumë; isha shumë krenare për të dhe ajo ishte modeli im. Ne ishim gjithmonë të afërta dhe ishim në kontakt, pavarësisht distancës.
Kjo humbje është një pikëllim i madh për familjen tonë dhe unë shoh se sa e vështirë është për prindërit tanë. Shpresoj se koha do të lehtësojë dhimbjen tonë. Vendosmëria e saj u admirua nga shumë njerëz. Martesa dhe marrëdhënia e saj me bashkëshortin është një shembull për t’u ndjekur, pa grindje apo skandale. Ishte dashuri e vërtetë, djali i tyre i bukur, është dëshmi e kësaj, një djalë i shkëlqyeshëm”- tha motra më e vogël e Hutchins, Svetlana Androsovych.
