Italia po përballet me kushte ekstreme të motit, duke shkaktuar përmbytje të mëdha në Siçili dhe Kalabri. Mediet italiane bëjnë me dije se rajoni i Siçilisë e ka shpallur vendin në “alarm të kuq”.
Shkollat në shumë qytete janë mbyllur.
Autoritete vendase raportojnë se një çift të moshuarish nga Scordia, në provincën e Katanias, është zhdukur pas reshjeve të dendura, që goditën rajonin.
Ekipi i shpëtimit ndodhet në zonë për të gjetur çiftin.
Reshjet e dendura të shiut kanë bërë që lumenjtë të dalin nga shtrati e të vërshojnë rrugëve të qytetit.
Në fshatrat ku kultivohen agrume, toka nuk është më në gjendje të thithë ujin e tepërt dhe tani vetëm majat e pemëve kanë mbetur jashtë ujit. Dëmi është i pallogaritshëm . “Nuk ka viktima apo të lënduar. Alarmi është i kuq”, thotë drejtori i departamentit rajonal të Mbrojtjes Civile Salvo Cocina.
