Pas dorëzimit në KLSH nga artistët e cirkut të asaj që ata e cilësuan “dosjen e rrëmbimit të tokës”, Kontrolli i Lartë i Shtetit njofton nisjen e një auditimi.
“Më datë 22.10.2021 pranë Kontrollit të Lartë të Shtetit është paraqitur një kërkesë me shkrim nga artistë të Cirkut Kombëtar Shqiptar. Përmes kësaj shkrese ata kërkojnë një hetim më të gjerë mbi veprimet apo mosveprimet e kryera nga Cirku Kombëtar dhe/ose Ministria e Kulturës. Në të referohen si shkelje nga ana e punonjësve të institucioneve të sipërcituara në kundërshtim me procedurën administrative të caktuar për mbrojtjen e interesave të tyre ligjore në kuadër të një procesi gjyqësor. Gjithashtu artistët kërkojnë një hetim më të thellë mbi mënyrën e menaxhimit të veprimtarisë së Cirkut Kombëtar nga ana e titullarit të këtij institucioni. Njoftojmë se në lidhje me këtë kërkesë për hetim, Kryetari i Kontrollit të Lartë të Shtetit, z. Arben Shehu urdhëroi në mënyrë të menjëhershme nisjen e auditimeve për të gjithë procesin e parashtruar në kërkesën e ardhur nga artistët e Cirkut Kombëtar”, njofton KLSH.
Cirku Kombëtar gjendet në një situatë serioze, për shkak se ka dalë pronari i tokës ku ndodhet e vendosur çadra e madhe e cirkut dhe kërkon që ajo të zhvendoset duke bllokuar aktivitetin e artistëve.
