Të tjera detaje raportohen lidhur me ekzekutimin e Demir Backës mbrëmjen e së shtunës në Fier, ngjarje që tronditi qytetin.
Backa u ekzekutua teksa ndodhej në njv automjet tip Audi, i parkuar pranë lokalit që ishte në pronësi të viktimës, në një prej zonave të populluara të Fierit.
Atentatorët qëlluan nga një automjet tip Benz, prej të cilit u shtie në lëvizje.
Policia tha se gjeti një automjet të djegur në vendin e quajtur Daullas në Bay-pass. Benzi i tipit ‘C Class’ me portobagazh, dyshohet se u përdor nga ekzekutorët në krim.
Brenda mjetit të djegur policia ka gjetur edhe dy armë zjarri, një automatik kallashnikov dhe një pistoletë, ekspertiza e të cilave pritet të provojë nëse ato janë përdorur ose jo në krimin e së shtunës.
Policia ka sekuestruar pamjet filmike të zonës, ndërsa hetimet janë përqëndruar në disa pista. Grupi hetimor, sipas raportimeve, po analizon të shkuarën e viktimës, si dhe ngjarje të ndodhura gjatë vitit të fundit, për të hedhur dritë mëshumë mbi motivin e atentatit.
