Dy të rinj janë arrestuar nga policia e Elbasanit, që ka sekuestruar një sasi droge dhe kapsolla detonatore.
Policia njoftoi se bazuar në informacionet e marra në rrugë operative për dy shtetas që posedonin lëndë narkotike dhe e shisnin në doza të vogla në qytetin e Elbasanit, Seksioni për Hetimin e Narkotikëve në Drejtorinë Vendore zhvilloi operacionin e koduar “Shënkolli”, në kuadër të të cilit u arrestuan në flagrancë: Skerdi Meta 18 vjeç dhe Edmond Luli, 29 vjeç.
Gjatë kontrollit në banesën e tyre në lagjen “Shënkoll”, janë gjetur dhe sekuestruar në cilësinë e provave materiale rreth 16 kilogramë lëndë narkotike kanabis, 13 kapsolla detonatore, 2 përforcuese grushti doreza metalike dhe 2 telefona celular.
Të arrestuarit akuzohen për veprat penale “Prodhimi dhe shitja e lëndëve narkotike” kryer në bashkëpunim, “Mbajtja pa leje e armëve shpërthyese dhe i municionit” dhe “Prodhimi, mbajtja , blerja apo shitja pa leje e armëve të ftohta”.
