Shtatë studentë kanë paditur një rrjet shkollash në Teksas për politikën e kodit të veshjes që ndalon djemtë të kenë flokë të gjatë.
Zyrtarët e shkollës pezulluan një djalë 9-vjeçar për një muaj, ndaluan pjesëmarrjen e tij në eskursione dhe pushimet normale të drekës si ndëshkim për flokët e gjatë, pretendohet në padi.
Ai dhe nxënës e tjerë, të moshës 7 deri në 17 vjeç, thonë se po shkelet kushtetuta dhe më konkretisht pjesa e saj që flet për diskriminimin seksual dhe pamjen.
Rrjeti shkollor i pavarur i “Magnolia” tha se “respekton pikëpamjet dhe qëndrimet e ndryshme”.
Sipas kodit të veshjes, djemtë nuk mund të mbajnë flokët mbi sy, të kalojnë pjesën e poshtme të veshëve ose të kalojnë pjesën e poshtme të jakës së këmishës. Duke u përballur me reagime të kundërta këtë verë, Magnolia mbrojti politikën, duke thënë se ajo “pasqyron vlerat e komunitetit në përgjithësi”.
Padia, e paraqitur nga Unioni Amerikan i Lirive Civile të Teksasit (ACLU) të enjten në emër të nxënësve, argumenton se rrjeti shkollor “shkaktoi dëm të madh dhe të pariparueshëm … vetëm për shkak të gjinisë së këtyre nxënësve”.
Padia detajon një numër dënimesh të dhëna për studentët. Njëri, një nëntë vjeçar i identifikuar si AC, është latin dhe i mban flokët të gjata si babai dhe xhaxhai i tij, si pjesë e trashëgimisë së familjes, thuhet në padi. Një tjetër, një 11-vjeçar i identifikuar si T,M. ka mbajtur flokë të gjatë prej kohësh.
Të dy ata u janë nënshtruar ndëshkimeve duke përfshirë pezullimin, mohimin e aktiviteteve jashtëshkollore dhe ndarjen nga bashkëmoshatarët e tyre.
