Fitorja në Budapest me Hungarinë ka ndikuar që Kombëtarja shqiptare të vijojë ngjitjen në renditjen e FIFA-s.
Kuqezinjtë janë të 63-tët në klasifikimin botëror për muajin tetor, duke fituar tre pozicione nga pozicionimi i mëparshëm. Pas humbjes me Suedinë dhe disfatës së papritur në shtëpi me Gjeorgjinë, Kosova zbriti në vendin e 113, duke humbur katër pozicione.
Italia, kampione e Europës në fuqi, u ngjit në vendin e katërt, pasi mposhti Belgjikën në finalen për vendin e tretë në Ligën e Kombeve.
Edhe pas zhgënjimit të radhës, Belgjika mbetet në krye të renditjes së FIFA-s, por tashmë Brazili i vendit të dytë është vetëm në 12 pikë distancë. Edhe Franca e sheh veten në podiumin virtual, duke u ngjitur në vendin e tretë pas triumfit në Ligën e Kombeve.
