Ndërsa po vijon turin e tij nëpër qarqe për të prezantuar drejtuesit e rinj të policisë, drejtori i Përgjithshëm i Policisë së Shtetit Gledis Nano duket se do të ketë shumë shpejt një përballje edhe me ligjvënësit.
Kërkesa erdhi nga deputeti i opozitës Enkelejd Alibeaj për ta pasur prezent në seancat e tjera në Komisionin e Ligjeve për diskutimin e projektligjit për shkrirjen e SHÇBA dhe krijimin e Agjencinë e Mbikëqyrjes së Policisë.
Diskutimet
Alibeaj: Ministri duhet të jetë dhe në seancat e tjera por do të kërkoja që përveç ministrit të bëjmë kërkesë për të qenë prezent edhe drejtori i Përgjithshëm i Policisë për arsyen se ligji ka dy aktorë kryesorë, pjesën ekzekutive, Ministri në këtë rast dhe i kontrolluar, drejtori i përgjithshëm i policisë. Është i emëruar rishtaz si drejtor i përgjithshëm i policisë.
Xhafa: Ligji ka nevojë për përmirësime, do sugjeroja të shikohet një axhendë e përbashkët me komisionin e Sugurisë. Ti ulim në tryezë të gjithë këta aktorë, drejtori i policisë, garda e republikës, ministria por dhe agjencitë e tjera ligjzbatuese që pikëtakohen shumë në këtë ligj. Ka disa aspekte si çështja e vlerësimit kalimtar.
Qefalia: Nëse do ftonim këtu policinë i bie të ftojmë dhe komandantin e Gardës dhe Zjarrfikësve. Por kjo nuk na heq të drejtën ne që meqë drejtori i policisë qenka emëruar i ri ta ftojmë në seancë dëgjimore dhe ta dëgjojmë por nuk ka lidhje me ligjin.
Alibeaj: Edhe dy drejtorët e tjerë të vijnë dhe të japin sensibilitet këtu. Jo si kërkesë për të krijuar tensione me Ministrin. Të dëgjojmë zërat e mbytur ndoshta.
Bushka: Të gjitha institucionet e kanë dhënë me shkrim mendimin e tyre, nuk ka rëndësi titullari. Do të jenë pjesë e akteve që do tu vihen në dispozicion.
