Katër persona, ndër të cilët 2 doganierë, janë arrestuar në një operacion të policisë së Durrësit për goditjen e kontrabandës me medikamente mjekësore.
Policia ka sekuestruar një sasi medikamentesh, kamera sigurie dhe “Rapid Test Antigen”.
Aksioni
Aksioni i koduar “Porosia”, erdhi pas “informacioneve të mara në rrugë operative se disa shtetas po transportonin medikamente mjekësore dhe sende të tjera të paligjshme, pa dokumentacionin përkatës”, konfirmuan burime zyrtare.
G.K., 35 vjeç, banues në Kukës dhe B.Ll., 57 vjeç, lindur në Kosovë dhe banues në Londër, janë dy prej të arrestuarve. Ata akuzohen për veprat penale “Kontrabanda me mallra të tjera”, “Kontrabanda me mallra të licencuara” dhe “Tregtimi dhe transportimi i mallrave që janë kontrabandë”.
Shërbimet e Policisë kanë ndaluar në lagjen nr.13-Durrës, një mjet furgon tip “Mercedes Benz”, me drejtues G.K. dhe pronar B.Ll. Gjatë kontrollit në këtë mjet janë gjetur dhe sekuestruar në cilësinë e provës materiale një sasi medikamentesh të ndryshme mjekësore, kamera sigurie dhe Rapid Test Antigen.
Në vijim të veprimeve hetimore, specialistët për Hetimin e Krimeve Ekonomike dhe Financiare arrestuan në flagrancë edhe shtetasit A.T., 58 vjeç dhe E.Sh., 52 vjeç, me detyrë doganier, të dy banues në Durrës. Ata dyshohet se kanë shpërdoruar detyrën duke mos kryer kontrollin e imtësishëm të mjetit ku u gjetën mallrat kontrabandë.
Hetimet e mëtejshme për rastin do të kryehen nga prokuroria e Durrësit.
