Partizani ka zbritur sot në fushë për seancën e radhës stërvitore në kuadër të derbit me Tiranën që luhet të hënën e ardhshme. Tek të kuqtë ka pasur vend për të festuar, pasi trajneri Ilir Daja mbushte 55-vjeç.
Nuk ka munguar torta nga ana e lojtarëve dhe pjesëtarëve të tjerë të stafit teknik. Megjithatë kryeqytetasi e kërkon dhuratën pikërisht ditën e hënë. Në një prononcim të dhënë për mediet ai ka thënë:
“Ndihem si në ditën e parë kur kam nisur punën si trajner, është një jetë e mbushur me futbollin. Dhuratat i kemi javë për javë pas çdo ndeshjeje. Dhuratën e vërtetë të 55-vjetorit shpresoj ta marr në derbi. Shpresoj që sfida ndaj Tiranës të jetë ndeshja e kthesës për ne”, ka përfunduar Daja.
Kujtojmë që ndeshja Tirana – Partizani është programuar të luhet të hënën, në orën 19:45, në stadiumin “Air Albania”.
