Ambasadori i Bashkimit Europian në Tiranë, Luigi Soreca, në një konferencë të përbashkët me kryeministrin Edi Rama,
tha se Shqipëria i ka përmbushur kushtet e vendosura nga Këshilli Europian dhe duhet të vazhdohet më tej me mbajtjen e konferencës së parë ndërqeveritare.
Por, Soreca theksoi se duhet vazhduar më tej me përmbushjen e të gjitha kushteve, duke nënvizuar vettingun dhe zgjatjen e tij.
Diplomati i BE tha se fusha kyçe është procesi i vettingut dhe zgjatja e tij.
“Shqipëria ka bërë përparime me reformat. Shqipëria i ka përmbushur kushtet që ishin vënë nga këshilli. Konferenca e par ndërqeveritare duhet të mblidhet sa më shpejt të jetë e mundur. Shtyrja ose vonesat do të kenë një ndikim negativ për besueshmërinë e BE.
Në fushën zbatimit të ligjit thuhet se janë bërë përparime në reforma dhe në luftën kundër korrupsionit dhe krimit të organizuar. Kjo punë për reformat duhet të vijojë dhe në veçanti ne presim që të ketë ecuri.
Një çështje që ka shqetësime është liria e fjalës. Atmosfera e sulmeve verbale kundër gazetarëve nuk duhet të vijojë më. Duhet bërë më shumë për të pasur pavarësinë e rregullatorit të medias. Vetërregullimi i mediave online duhet të sigurohet, qeveria dhe parlamenti duhet të angazhohen”, tha Soreca.
