Derbi i kryeqytetit luhet të hënën, mirëpo emocionet e kësaj sfide kanë nisur prej ditësh. Tirana apo Partizani, cila skuadër do të fitojë në “Air Albania Stadium”? Përgjigjen do ta keni vetëm pas takimit që do të startojë të hënën në orën 19:45. Ngacmimet kanë nisur dhe mes tifozëve, por më të rralla janë ato që ndodhin mes protagonistëve që i shërbejnë në një mënyrë ose tjetër futbollit.
Këtë herë në qendër të vëmendjes vihet Jasir Asani, ish-sulmuesi i Partizanit që u largua në Hungari në merkaton e verës. Mëngjërashit i pëlqen të ngacmojë e kur vjen puna te derbi, ai i shton dyfish dozat. Në një postim të Enxhi Bibës në rrjetet sociale, Asani i kërkon ta heqë fanelën e Tiranës duke i theksuar se i shkon më shumë e kuqja.
E ndodhur përballë kësaj situate të papritur, e ndoshta e papërgatitur, Biba pëlqen të luajë dhe me finesë dorëzohet ndaj kërkesës së një nga lojtarëve më të mirë të viteve të fundit në Shqipëri.
“Ngjyra e kuqe më shumë të shkon”, i shkruan Asani duke qeshur. E menjëhershme përgjigja e Bibës, e cila i thotë: “Jasir Asani, s’e mohoj atë”.
