Nga Dibra, ku po zhvillon Foltoren e rradhës, ish-Kryeministri Sali Berisha paralajmëroi Kryeministrin Edi Rama, se do të përballet me demokratët për të gjitha të zezat që i ka shkaktuar shqiptarëve në 8 vitet e regjimit të tij.
Ndërsa u prit nga disa dhjetra anëtarë dhe simpatizantë të PD-së, Berisha u ka kërkuar ndjesë dibranëve, për mbështetjen që i ka dhënë Lulzim Bashës, të cilin e konsideroi një ish-kryetar të kësaj partie.
“Ndoshta duhet të rikthehesha që në 2017, për të mos i dhënë mundësinë Edi Ramës të merrte mandatin e 3-të si Kryeministër. Ne patëm një opozitë që i bëri fresk regjimit të Edi Ramës. I kam kërkuar Lulzim Bashës të jepte dorëheqjen në 2017, dhe ndjesa që ju kërkoj nuk mjafton, pasi nuk kam bërë publike problemet me të cilat përballej Partia Demokratike”, tha Berisha.
Ai shtoi se Edi Rama e ktheu Tiranën zyrtare në një vasale të Beogradit, braktisi procesin e Berlinit, dhe iu bashkua nismës së Aleksandar Vuçiç njëherë me mini-schengenin dhe tani me “Open Balkan”.
“Sot drejtësia shqiptare është më e kapur se kurrë, në krye të institucioneve janë vëllezër dhe kunetër të ish-ministrave të PS-së”, tha Berisha, duke shtuar se janë 3 anëtarë të Gjykatës së Lartë, Sadushi, Panda dhe Pupo, vettingu i të cilëve është “top sekret”, pasi po u publikua duhet të lenë detyrën, pasi janë të krimbur dhe të kapur nga Edi Rama.
