Partizani nuk po kalon aspak një moment të mirë. Të kuqtë në 5 javët e para nuk kanë marrë ende fitore e parë dhe janë futur në një krizë rezultatesh. Legjenda e Partizanit, Edmond Dosti përmes një postimi në rrjetet sociale kërkoi largimin e trajnerit Ilir Daja.
I ftuar në emisionin “Zona Zero”, Dosti ka sqaruar postimin e tij, ndërsa ka theksuar se Daja duhet të largohet pasi ka marrë çfarë lojtari ka dashur dhe skuadra nuk po jep rezultat. Më tej, legjenda e të kuqve ka propozuar edhe trajnerin që duhet të ulet në stolin e skuadrës në rast largimi të Dajës.
“Statusi im nuk kishte të bënte me Dajën, por me të ardhmen e Partizanit. Ilir Daja ka pasur dorën e lirë te Partizani, si nga presidenti dhe nga drejtori. Ka blerë dhe marrë lojtarët që dëshironte, pa asnjë ndërhyrje nga askush, jam shumë i sigurt. Të gjitha i ka pasur në dorë Daja dhe Partizani nuk po jep rezultate. Po e shohim që nga porta, mbrojtje, mesfushë dhe sulm që nuk po funksionon.
Si një ish-lojtar i Partizanit unë po jap mendimin tim dhe gjithmonë kur kam parashikuar situata të caktuara, gjithmonë kanë dalë. Kështu si po vazhdon, e pamundur që Partizani të dali kampion. Ose Daja duhet të dali dhe të thotë se ekipi im nuk është për kampion, që ta dimë. Unë sygjeroj Duron për Partizanin pasi e kam parë në stërvitje sesi përgatiste Laçin. Bëri një ekip me pak buxhet dhe gëzoi gjithë shqiptarët në Europë”, u shpreh Dosti.
