Kryeministri Edi Rama tha se është i gatshëm të ulet me opozitën për çdo çështje që ka të bëjë me dy palët, pavarësisht që mund të ketë qëndrime të ndryshme.
Rama u pyet në emisionin “Now” lidhur me propozimet e bëra nga opozita për Vettingun e politikanëve, ndryshimet Kushtetuese të korrikut 2020 dhe reformën territoriale, ndërsa tha se “jam gati të ulem të diskutoj çdo çështje të propozuar”. Rama tha se nuk e ka problem të ulet në tryezë bisedimesh edhe me Lulzim Bashën, ballë për ballë.
“Nëse na bindin se duhen zhbërë ndryshimet Kushtetuese të bëra në korrik, atëherë s´ka asgjë pse të mos zhbëhen. Rëndësi ka që ne të kemi një dialog, pa ultimatume dhe pa urdhëra. Duhet të kemi një dialog në pozita të barabarta.
Vettingu i politikanëve është një çështje e brendshme, që s´ka lidhje me vettingun e madh, atë të drejtësisë”, tha Rama.
Kryeministri tha se është dakort për ndarjen e re territoriale, por shtoi se qëndrimi i tij, është që të ketë më pak bashki në numër se sa janë aktualisht.
