Asfiksi, helmim, vrasje pa gjurmë? Pistat e hetimit për vdekjen misterioze të turistëve rusë

Pista që ngrihen, por që duken se nuk kanë argument dhe rrëzohen. Vazhdon të mbetet mister vdekja e katër turistëve rusë në një hotel në Kavajë.

Burime nga prokuroria e Kavajës thonë se vijojnë hetimet në lidhje me ngjarjen tragjike, ndërsa në trupin e viktimave nuk janë gjetur shenja dhune.

Familja ruse, prindërit dhe vajza, si dhe i fejuari i saj u gjetën pa jetë natën e së premtes në pishinën dimërore të hotelit luksoz në zonën turistike të Qerretit. Fillimisht u deklarua se të katër u gjetën të asfiksuar brenda ambienteve të saunas.

Por trupat e viktimave u gjetën në pishinën dimërore të hotelit, pranë saunës. Turistët rusë kishin kërkuar që ambientet e SPA-së përfshirë dhe pishinën e brendshme të ishin gati që pasi të ktheheshin nga vizita e tyre në Ohër të mund të relaksoheshin në to.

Punonjësi që përgjigjet për pishinën e kishte pastruar gjatë ditës duke përdorur dhe klor, por është shumë e dyshimtë që asfiksia e tyre të ketë ardhur njëkohësisht dhe për të katërt nga përqindja e klorit në ujë.

LEXO EDHE  LAJM I FUNDIT/ Përfshihet nga flakët çerdhja në Fier

Në këto rrethana misteri mbi vdekjen e tyre është i madh edhe për grupin hetimor, burime nga i cili thonë se pista më e mundshme është ajo e një vrasjeje pa gjurmë. Ndërkohë në fillim të javës pritet që të dalin rezultatet e autopsisë të cilat do të hedhin më shumë dritë mbi shkakun e vdekjes. Në sitën e grupit hetimor po kalojnë dhe të gjithë personat e akomoduar në hotelin ku ndodhi ngjarja.

Grupi hetimor po bashkëpunon dhe me ambasadën ruse dhe autoritetet përkatëse për të mësuar më shumë mbi viktimat dhe veccanërisht aktivitetin profesional të dy burrave. Grupi hetimor tregohet mjaft i rezervuar për të dhëna në këtë drejtim, ndërsa hetimet po vijojnë dhe paralelisht ka nisur dhe procedura për kthimin e trupave në atdheun e tyre, por pa përcaktuar kohën e saktë. /TCh