Kursi i UEFA-s dhe ecuria e Partizanit, drejtori Rama “mesazh” lojtarëve: Më vjen mirë që jemi në fillim të sezonit, pretendojmë kthesën që nga sfida me Kukësin.
Drejtuesit e klubeve të Superligës prej dy ditësh kanë pjesë në disa seminare të organizuar nga UEFA dhe Federata Shqiptare e Futbollit në Durrës.
Bëhet fjalë për “Certificate in Football Managment” (UEFA CFM), një program i domosdoshëm për këdo që punon në një organizatë futbollistike e që dëshiron të rrisë nivelin e menaxhimit dhe performancës.
I pranishëm në këto seminare ishte edhe drejtori i Partizanit, Olsi Rama. Në një intervistë për “Top Channel”, Rama ka zbuluar më shumë rreth këtyre seminareve, ndërsa ka folur edhe për sezonin e ri të Partizanit.
Kursi i UEFA-s? “U prezantuam vitin e kaluar me këtë iniciativë të re, një diplomë që është mbi nivelin e drejtorit sportiv. Përditë dhe në çdo kohë produkti përmirësohet kështu edhe futbolli shqiptar mendoj unë. Do të ishte shumë e vlefshme që kjo eksperiencë që ne po marrim këtu si unë dhe të gjithë pjesëmarrësit të transmetohej në nivelet e tjera”.
Sezoni i Partizanit? “Partizani i këtij viti mund të them që më vjen mirë që jemi vetëm në fillim të sezonit. Pretendojmë sigurisht që ecuria e mëtejshme të jetë në rritje. Shpresoj që këtë ta shohim që nga dita e diel përball Kukësit”.
Kampionati shqiptar pa kufizime si kombëtarja? “Në radhë të parë detyra jonë është që t’i bëjmë tifozët të duan të vijnë në stadium dhe kur të dali problemi i kufizimeve shpresojmë që edhe pandeminë apo problemin madhor të pandemisë ta kemi lënë pas dhe të vijnë të gjithë në stadium sepse edhe unë atë dua”, u shpreh Rama.
