Deputetja demokrate Albana Vokshi shprehet se liria e fjalës dhe e medias në vend është e rrezikuar. Ajo shton se duhet t’i bëjmë ballë të gjitha përpjekjeve kundër lirisë sonë.
Në një reagim në rrjetet sociale, Vokshi sjell në vëmendje një reagim të “Reporterëve pa kufij” lidhur me deklaratat e kryeministrit Edi Rama.
“Reporterët pa Kufij (RSF) denoncon Kryeministrin Rama, i cili, gjatë një konferencës të OSBE-së, sulmoi mediat dhe njerëzit e medias duke i krahasuar ata me nazistët, terroristët dhe pedofilët. Pas europarlamentarëve, edhe RSF denoncon, gjithashtu, kthimin në Kuvend të draft ligjit të medias, të hedhur poshtë nga Komisioni i Venecias, BE dhe organizatat ndërkomëbtare si cënim i lirisë së medias”, shkruan Vokshi.
“Liria e medias, liria e fjalës janë të rrezikuara në Shqipëri. Pa të drejtën e fjalës, pa të drejtën për të shprehur lirisht mendimet nuk mund të ketë liri politike dhe civile. Ndaj ne duhet t’i bëjmë ballë të gjitha përpjekjeve kundër lirisë sonë”, shton ajo.
