Katër turistë hungarezë që rrezikuan të mbyteshin në lumin Devoll u shpëtuan nga ekipet e policisë dhe zjarrfikësve të Qarkut Korçë.
Turistët tentuan të kalonin me makinë lumin, por për shkak të thellësisë dhe rrymave të mëdha të ujit, ata u bllokuan.
Makina me turistë u mor nga rryma përreth 15 metra, por fatmirësisht nuk u lëndua asnjë prej tyre.
Ishin banorët e zonës ata që lajmëruan policinë, ku bashkë me ta shkuan në vendngjarje dhe zjarrfikësit, të cilët me kavo bënë të mundur sigurimin e makinës që të mos e merrte rryma e lumit.
Në total ishin 4 makina me rreth 10 turistë hungarezë që po eksploronin zonën, por vetëm një makinë u fut në ujë.
