Një javë pas sulmit vetëvrasës në një xhami në qytetin verior të Kunduz në Afganistan, sot një tjetër sulm është shënuar gjatë lutjeve të së premtes në Kandahar.
Mediat ndërkombëtare raportojnë se të paktën 16 persona kanë humbur jetën dhe 32 të tjerë janë plagosur nga shpërthimi në një xhami shiite në qytetin afgan të Kandaharit.
Shpërthimi ndodhi në xhaminë Iman Bargah. Pamjet nga vendi i ngjarjes tregojnë dritare të copëtuara dhe trupa të shtrirë në tokë, ndërsa të tjerët përpiqen të ndihmojnë.
Shkaku i shpërthimit nuk është ende i qartë, por dyshohet nga një sulm vetëvrasës.
Të Premten e kaluar, një sulm vetëvrasës ndaj një xhamie shiite gjatë lutjeve të së Premtes në qytetin verior të Kunduz vrau të paktën 50 njerëz. IS-K tha se kreu sulmin, i cili ishte më vdekjeprurësi që kur forcat amerikane u larguan në fund të gushtit.
