Britania e Madhe po përballet me një krizë të madhe në energji dhe në produktet ushqimore. Mediat ndërkombëtare shkruajnë se kjo vjen për shkak të rritjes së çmimeve dhe ngecjes në zinxhirët e furnizimit në periudhën pas pandemisë.
Për këtë situatë alarmante ka folur eksperti i parave dhe të drejtave të konsumatorit në “Resolver UK”, Martyn James. “Pandemia ka mbyllur shumë zinxhirë furnizimi. Pandemia ka ndikuar negativisht në transportin detar. Ne po përballemi me probleme të shumta, nga gjetja e shoferëve të kualifikuar të kamionëve, për shembull, te njerëzit që punojnë në fabrika për përpunimin e mishit.
Ne kemi parë reagime të pazakonta, si njerëz që blejnë në panik apo që nxitojnë të marrin benzinë edhe pse kanë benzinë të mjaftueshme për të qarkulluar. Shumë nga industritë tona mbështeten në energji elektrike dhe nuk kanë kufizime për të parandaluar kompanitë që të paguajnë atë që duan. Pra, ne po shohim disa situata ku disa biznese mund të duhet të mbyllen, sepse është shumë shtrenjtë të qëndrosh në prodhim”, tha ai.
James shtoi më tej se e gjithë kjo shkakton presion të madh mbi qeverinë dhe aftësinë e saj negociuese me vendet e tjera në botë, veçanërisht në një kohë kur ajo po përpiqet të krijojë marrëveshje të reja tregtare, duke çuar në një perspektivë të zymtë, tani për tani./BW
